PANTUN ENDA AMPIT

Aih…..letap se…..letap,
Nadai enda ngemadas nya senual nya ulak betunggal kapal asap,
Kasih udu nya ayu, sayau amat iya di kumbai jalih sekelat,
Ku aku genuli kumang, tampang se….lindang.

Aih…..nadai enda ngenyelai nya meh mimpi aku selantang asi,
Tinduk di baji aku talun di pansap, galai di tikai aku menyadi wai sapar empat,
Dia tubuh bela aku kumang lenta tak mimpi tangga di tempa aku tinchin kawat,
Mimpi pumping perabung aku kumang lulung, rarat di atap,
Mimpi tekesai di kalai aku kumang jatai, rarat pengerat,
Dia aku mimpi malik ke tanju aku selantang orang indu,
Meda antu abu bangat dua iku bekain kebat,
Dudi aku nanya dulu aku ka ngayap ninga nyawa nya badas amat,
Tak bekedanyat munyi sepat ku aku genuli kumang, ruding te…guran.

Aih….bangat sebulan-bulan aku selantang ayam mimpi rawan,
Setaun-taun aku mimpi ringat ka penapat,
Dia tubuh lempang aku genuli kumang,
Tak mimpi terembang ke madang nya biru pelat,
Dudi aku amang dulu aku pantap,
Ninga semiap munyi pengangkat ku aku genuli kumang, bilun te….rebang.

Agi ga tubuh lemi aku selantang menyadi,
Mimpi jai begulai enggau mimpi ringat ka amat,
Mimpi runtuh pelabuh aku naban ke manduh tajau jumat,
Mimpi tekesai di tikai, rarat di pengerat ,
Nama meh di ayu ke mimpi aku tu kumang sipu bangat ka udu,
Sebulan-bulan tu aku mimpi rawan, setaun-taun aku mimpi ringat.

Dia tubuh liut aku kumang lemuk nupi uduk penama lampat,
Di asuh ke aku ngagai ulu nya kumang sipu langgai gat,
Di sadang ke aku terebah ke ngelampai nya menyadi wai babi emperingat,
Nemu salak nya tak mealat-alat,
Kasih udu meh iya di kumbai orang menawa kulat,
Ku aku kumang jawai, di gulai indai aku….buchai.

Dia tubuh lemi aku selantang menyadi mimpi nginti salah sukat,
Dini nya ka bulih gemiu nya kumang sipu ikan kepiat,
Kebata tisik nya pandai bekebelik, singapnya pandai bekebelap,
Nya orang ginti pandai penapat ngelaban rechap,
Ku aku kumang, ulak…lenggang.

Kasih meh tubuh lemi aku menyadi wi,
Ka udu mimpi jai begulai enggau mimpi ringat,
Dia meh tubuh jimat aku ngayu Kediri empu puni insap,
Kasih pinang ku aku genuli kumang, ilum ………pinang.