NYADI MINTA KITA MAIOH, KITA BANYAK, BAIK KA TUAI, BAIK KA NEMBIAK, BAIK KITA KA PUNAS TAUKA BISI ANAK,
UJI NGETU DULU KITA BEJAKO, DIAU JENOH ANANG RAGAK..
AKU TU UKAI LEBIH-LEBIH , GENIH-GENIH, LUBA-LUBA, ENDA BEBASA.
PEDA BALA KITA BEDIRI DEGI-DEGI,
NUNGA KITA RABAN MENYADI,
KE KEMUMOK DUDUK BEBANDI,
MANGKANG KELIMBANG BAKU BEKUNCHI,
BEKEKAH KA BUAH PINANG PENGUJI,
BECHARIK KA CHEBIK SIRIH BANGI,
BALA INDU BISI DITU, NYERETA BALA LELAKI.
NYA ALAI KETEGAL KA NGINGAT KA ADAT,
NGINGAT KA SEMPEKAT, DEKA NGINGAT KA SEMAIA,
NGINGAT KA TANDA, NYA MEH KEBUAH KITAI MALAM TU,
MAIOH BALA KITAI DITU BAKA BELOH LUGAN KERAPA,
BANYAK ARI LEMETAK TINTING LINGGA,
MAIOH ARI BELOH NYARU ARANG,
BANYAK ARI SERAK TUNGKUL PISANG.
ARI NYA TADI, APIN RANGKANG NGACUK MATA,
APIN PENYARUT MALUT MENSIA, KITAI ENGGAI APAS,
JAKO AJAR GEMBAR TANGKAN,
JAKO LALAU ENGGAU PESAN.
ORANG KA NGEMPU GAWAI TU,
ENDANG DEKA KA UTAI LURUS ENGGAU UNTUS,
ENDA SENIKA NADAI NGAWA.
NYA ALAI NGAGAI SEMOA KITAI PENGABANG MAIOH,
IYA KE DATAI ARI ULU DI AMBI NGABANG,
IYA KE DATAI ARI ILI DI AMBI MANSANG,
DATAI ARI ULU DI AMBI NEMUAI,
DATAI ARI ILI DI AMBI MAKAI.
NYADI ENTI SEMA AIT TUAK,
EMBIH MALAM TU, ANANG BANGAT NANYA, ENGKA NADAI AGI, AI TUAK PUAS AMAT KITAI NANAK, LABAN ENGGAI ENDA BECAMPUR ENGGAU GULA.
NYADI JANI, ENTI EMBIH MALAM TU, KITA ANANG RINGAT, ANANG ENGKASAK, PEDIS AMAI BETUPI, LABAN ENGGAI ENDA DI BERI BAJA.
ENTI MANOK EMBIH, KITA ANANG BEJAKO ITOK, NYADI MANOK PEDIS AMAI KITAI NUPI, TAJA ORANG ARI OPIS AGIRCULTURE KA NUCHOK, PAGI SITI DI PEDA BEKETEPOK LABOH MATI MANSA.
ENTI SAGERIT TIGA LIMA, KITAI ANANG NANYA, NYA ENDA ALAH DI INSAP, LABAN NIKI REGA, KA PAN ENGGAI SAMA BEGILING KA RUKU, ENGGAU SEMAKAU DI BELI ARI BADAU INDONESIA.
NYA ALAI TAK CHANGKA MEH AKU TU DIDINGA KITA,
NAGANG KITA KA BEJAKO PANJONG NGELARA,
LABAN KEBUAH TU LAGI, KITAI DEKA NGERINTAI LEKA GELIGA.
NYA ALAI NGAGAI KITA KA NGEMPU RUMAH DITU,
NYANGKA GELEGAR KITA DITU BISI PATAH SELAMBAR,
KENA ANSAR TAPA KAKI,
ANANG MEGA KITA BEGUAI RINGAT BEKEDAR KA JARI, NYANGKA PINGGAI KITA DITU BISI PECHAH, ENGKA MANGKOK KITAI BISI BELAH, ANANG MEGA KITA BEGUAI MINTA GANTI, LABAN NYA ENDANG BAKA KITAI, NGINTU PENGAWA NGAGA PENGERAMI.
TANG TI UTAI PECHAH, ALAI PENGABANG BEINAS, ENDOR PENGABANG BEREMPAS, ENDUR BETUTUK, ENDUR SIDA BETUMBUK, ITAU NYA ENDA TAU ENDA DI GANTI, PECHAH SIGI GANTI DUA, PECHAH DUA GANTI EMPAT, LALU DISANGKING ENGGAU ADAT SIDA KA NGEMPU RUMAH.
NYA ALAI NGAGAI PENGABANG TI MAIOH DUDUK BERINTAI, NYANGKA BISI KEDA ENDA AMPI MAKAI, ANANG BEGUAI RINGAT BERUMBAN PULAI,
SAMA GA KITAI UDAH BEJEPUT KA KERAT BABI.
NGAGAI KITA PENGABANG MAIOH, DUDUK BETUBOH DUDUK BETANGKUB, NYANGKA KITA BISI ENDA AMPIT NGIRUP, ANANG KITA BEJAKO MUT-MUT, SAMA GA KITAI UDAH BEKECHUP KA AI SECANGKIR KOPI.
NYA ALAI PENGAROH ENDA TAU DI BUBUH DI MOA MAIOH,
PENGAYA ENDA TAU DI CHERITA, DENGAH ENDA TAU DI PADAH,
PENGERING ENDA TAU DI BANDING,
PEMERANI ENDA TAU DI TUSI, LABAN SEMUA UTAI TU DI TANGGONG TUAH, TUBUH KITAI EMPU MAGANG.
BESAI SILAK NANGA SARAWAK, SEBAKA ENGGAU NANGA SINGAPURA,
ENTI KAIN SEBAKA PUNCHA, ENTI TAJONG SEBAKA ARA,
ENTI IA EMAS EMBAR REGA, ENTI PIRAK SEBAKA GAYA, ENTI TINCHIN SEBAKA MATA ANTIN SEBAKA RUPA, ENTI DUIT SAMA CHAP AGONG RAJA MALAYSIA.
ENTI UTAI TU BISI BERAYAN SEBELAH PENGKALAN, BISI TELEMPAI SEBELAH PEMANGGAI, BISI TEKETIK SEBELAH BILIK, UTAI TU ENDA TAU DI AMBI KA TUAH TAUKA KA LIMPAH.
TEMU SERAH NGAGAI TUAI RUMAH,
TERANG NGAGAI PENGABANG, ADU NGAGAI PENGULU,
NGAMBI KA ORANG TI BEGIGA NYAMAI NUJU,
UDAH LEPAS TU LAGI NYAMAI GA KITAI,
BEDINDANG SAYANG BELILA SURA,
BETEMPAP KA KA JARI ANGKAT SERETA.
