Leka Jaku Silup

JAKO PEMUKA (Nitih ka iya ke ditulis dalam Bup Ensera ADI PAU tu) Aku ke ngusai ka jerita Ribai Datai ari Gilik Tasik Besai Alun bungai gigi gumbang. Ukai ati bisi beseni lain asai Ukai mantah besalah jalai. Tang laban deka ngingat Ka urat jerita tuai Deka ngayan ka leman asal kitai Awak ka bisi dipelemati ka sida kedudi Lalu ka penemu sida rebak baru Ka sulu pemandai bukai. Aku ke ngading ka Keling Ngara ka sida Laja Ngerintai sida Sempurai Enggau samoa bala bukai Ke di Menyaung Rabong Gegiai Lendat dibiau jila isang. Ukai ati aku beseni bisi bingking Betambah salah jai runding. Tang deka mansut ka iya ba bup Deka ngeleka ka iya ngena angka Ngambi ka bisi dibacha samoa orang Aku ke ngenang sida Kumang Ngitong sida Lulong Enggau samoa bala bukai Ke di Tigong Gelong Batu Besundang Ukai ati aku beseni udu changka Ukai sumbong panggong enda bebasa Ukai mejah mantah nama. Tang awak ka bisi pematak Sida ka anembiak mansang sekula, Lalu ka peransang orang belajar macha, Lalu ngelala guna penemu tuai. Nya alai aku minta ampun Ngagai samoa kita ka kena Sebut ensera tu. Enti jako tu bisi salah ulu Anang guai lalu nganu Tang beri aku penau penemu ngereja. Enti reti bisi salah munyi Anang lalu begedi ati, Tang beri aku pemereti luar kekira. Enti sipat iya bisi salah anggap Anang guai lalu ringat Tang ajar bejimat jalai bebasa. Enti selit bisi salah mimit Anang guai lalu michit, Tang beri kami beruru batu pengait beruit Awak ka sama betarit tarit ngaga Ensera……